由睫毛膏開始，開心share

其實本身我睫毛就又短又唔撓嘅！所以要化個全妝對眼要精靈啲除咗用眼線之外又捲又撓嘅睫毛就係令對眼加分重要一環！試儘不少品牌嘅睫毛膏，以下冰山一角，以往用過扔過不計其數

要講好用其實都好個人化，你鐘意誇啲定自然啲？講易唔易溶係咪真係waterproof?咁要睇你眼瞼出油勁唔勁，眼淚流得多唔多喇！
我本身呢就眼油都出得多嘅，另外就係我好容易流眼淚，讓我笑多兩笑呢都流晒眼水嗰啲人嚟！所以大家明點解我試咗咁多睫毛膏!


使用睫毛膏嘅小小心得，一開始拎咗個睫毛膏出嚟一定要先過紙巾，過走起碼七成，一開始由底向上掃，向上掃嘅時候係睫毛根位到停10秒8秒，等個根位挺啲keep住捲，眼頭位置就向鼻樑方向掃，眼尾嗰度嘅位置就向髮線方向掃，咁就會有個發射線咁靚嘅眼睫毛出咗嚟啦！


睫毛膏總括我偏愛以下幾隻：

大愛1.dejavu Lash Up Mascara :夾好睫毛揸佢睫毛唔會drop亦都好自然，根根分明，無一嚿嚿，亦無曱甴腳嘅！Long keep唔易溶

大愛2. 都係同一個品牌，呢期新出嘅～dejavu Fiberwig : 呢一個呢都係揸咗出嚟會好自然嘅眼睫毛唔會drop，佢呢就係新改良咗加長眼睫毛嘅纖維，加長咗眼睫毛又唔會一嚿嚿嘅亦都唔會話好假就好啱我呢啲喜愛自然風嘅煩人！要買就可能要行多幾間SaSa嗰啲先有啦！因為我都行咗幾間先買到，同埋呢一個牌子都出晒名係防溶同埋long keep得好好！

大愛3. Maybelline BIG EYES Barbie mascara，呢一個要讚下Maybelline呢個設計非常好，佢係咁用嘅：先用黑色睫毛膏打底，然後用白色纖維毛毛係睫毛上印幾印(最理想做到向上碌)，再用返黑色睫毛膏揸上去，即時濃密咗同加長咗啲睫毛，有啲似假眼睫毛咁，有咩喜慶日子要濃啲妝就啱晒！Good fit！

以前曾經試過美國某品牌出品僭建睫毛嘅黑色纖維毛毛，用法係同Maybelline 呢隻一樣，但係佢嘅黑色纖維毛毛真係好伏，一用實唔多唔少跌咁啲係面，佢本身係好細心地跟咗個小掃仔比你掃走啲毛，但係要掃走就要比啲心機，仲要小心啲咪掃花個妝，用一次即時將佢存起，咪再玩自己！

但係Maybelline呢個係用白色纖維毛毛同埋佢好輕身好黏到睫毛膏，相當User friendly，新手亦無難度！

講完大愛，試咗咁多總有啲係失望嘅！唔啱我用囉~

同期新買咗上圖裡面有出現嘅Lancome Grandiose smudgeproof mascara，一開始用都覺得唔錯，都幾挺無drop到啲睫毛嘅，點知半日唔夠我就自然地有條下眼線陰影，又係用一次就係咁先~   

另外就要極推薦Laura mercier 嘅睫毛夾，因為好適合我嘅眼型弧度，其實幫人化妝多數我都係用呢款，比較易用又較多人適合用，其實坊間有好多同款，但係彈弓同埋條軟膠嘅質素問題，結果都係Laura mercier 呢個無得輸，夾幾夾就又撓又捲！勁推！