2016年9月30日 星期五

化妝棉~護膚基本需要用品,亦係好難搵到啱心水

今次介紹嘅係一個日本製嘅化妝棉係莎莎卓悅各大化妝品舖應該都搵到架啦⋯⋯

見到佢有三個公仔頭介紹呢個化妝棉其實可以點用:

基本清潔/擦拭抺面:
實際佢係5塊薄薄嘅化妝棉夾成1塊較厚身嘅化妝棉,正常用嚟索化妝水拍上面抺走面上老化角質層或抺御妝水落妝我會建議是撕一至兩塊薄身嘅出嚟用,絕對唔使咁晒料用一晒整塊

緊急補水用敷面:
如果好似我咁懶又咁慳,就可以用整塊即係夾咗5薄片嘅,索晒化妝水/花水/神仙水,記得想要敷面一定要索得夠濕先用,先輕抺走面上老化角質,再續片撕返5片出嚟敷面,如上圖咁敷返面上5點,敷返兩三分鐘後,撕返出嚟叠返一齊再輕拍返剩餘嗰啲花水/神仙水上面仲可以好有水份咁拍上面,一啲都唔好浪費,因為輕拍化妝水上面呢個動作亦係可以令皮膚水潤令花水/神仙水更吸收,之後可以繼續搽日常護膚品,好方便!
有時懶又或者趕時間,但又面乾乾,唔想敷完Mask又要洗下個面先再搽嘢就可以咁做😉

呢啲轉季時份用以上方法可以保住皮膚唔好咁乾燥同敏感,Mask就唔可以日日敷,但係神仙水/花水就日日敷都完全無所謂!朝早皮膚狀態唔太掂,用呢個方法急救下都唔錯👍🏻

正正亦講出點解我咁鐘意呢款化妝棉,除咗實用佢亦都好好質地,相當軟滑👍🏻
價錢都唔貴,經常特價20蚊到一盒,絕對抵用!

無論基本清潔擦拭面上污垢老化角質,定係化妝水敷面補水,記得化妝棉必須夠濕先好擦上面,因為乾燥嘅化妝面只會同你嘅皮膚作出摩擦引起刺激或敏感反應!化妝水就唔好慳喇!每日一次將老化角質抺走,之後再擦嘅護膚品先真正做到最吸收啦!

Facebook專頁



一旦迷上,好難忍手~

迷上Lecreuset 同迷上SKII 一樣,好難忍手呀⋯⋯

有實際用途亦有觀賞用途更有治療心靈嘅一大用途!

秋天日本限定紅葉版~救命呀⋯⋯點忍呀⋯⋯
好彩剛有老細去日本遊玩順便幫我買下心頭好😍😘

超級心心眼😍

2016年9月25日 星期日

港女追捧名牌餐具~Lecreuset

剛過去就係一眾港女追捧嘅餐具品牌Lecreuset 半年一度開倉大日子!

當然,我呢個100%港女亦都追到貼一貼,因時間關係都入咗兩場掃貨,但係心頭好五層架就無緣成為家中一份子喇!太搶手!心有戚戚焉呢⋯⋯


今次買嘅嘢唔算多啦!專攻石頭系列,因為煲就係開倉前英國網購站The HUT買咗兩個🤗🤗超級抵買!

我呢個紫控+粉控當然就係癲咗地揀揀揀、買買買啦!

對比起上一次4月嘅開倉今轉算係多貨揀,至少好多Hot item都可以見到、揀到、買到!

👆🏻呢張係第一次入場嘅收穫,第二次入場就添咗👇🏻呢啲
手就係好難忍咖⋯我諗你哋係會明嘅,除非真係唔明啦⋯⋯

迷上Lecreuset 皆因我家有個東芝水波爐,Lecreuset 嘅煲及餐具與水波爐係好朋友,結合下齊用係無懈可擊!可燉、可炆、可焗、可烤亦可蒸,當然微波亦都係無問題啦⋯⋯


剛敗完家就要扮嘢善用買咗返嚟嘅心頭好啦⋯⋯好靚、好靚、好靚呀!
重點:👆🏻桂圓杞子燉雪梨
東芝水波爐 superheat steam 160度30min 完成

愛上廚房、愛上水波爐、愛上Lecreuset

#Lecreuset
#LC
#Lecreuset開倉2016秋
 





2016年8月13日 星期六

GIVENCHY碎粉用一個月後感~

十呢個碎粉真係要小心⋯一試會愛上,極幼滑、質感輕身、Matt tone <—係夏天我唔想太光澤!

👇🏻留意下兩個粉卜係唔同料嚟!

我當初只想試下所以係counter揀咗盒紫、藍色,因Mix後係變提亮,通透色tone,紫藍亦可減低偏紅膚色!點知用落試真係會好鐘意佢嘅質地超輕亦超級貼膚!仲要係咁熱嘅天氣下出一日街都keep到無溶妝,只係鼻翼位有啲出油情況,絕對接受到啦!日日三十幾度喎⋯
Counter 姐姐教你就係用佢個卜上面,由外而內咁上面嘅,因為粉太幼滑如果第一下就上面珠嘅話就會好重手。
不過我一向唔buy用卜上粉,無論碎粉與粉餅我都係用掃上面,令面上沾粉均勻同埋薄身自然,所以呢個我都係用個大碎粉掃上面,我都係由外以內掃上面,眼底同鼻翼我就會用卜上面剩餘嘅份量壓一壓,再用細掃輕掃走多餘嘅份量,咁妝會持久一啲!

另外,佢個綠色tone可以用嚟掃係啲偏紅位置,我亦有用佢嚟遮蚊「冷」位,先用遮瑕再用佢定妝👍🏻


之後咁啱有朋友仔網購嘢,即刻順便加埋單買多盒,膚色tone,掃上面有揉膚自然色調!跟住對比兩盒粉嘅粉卜質地唔一樣,英國網購嗰盒個粉卜靚啲喎!仲要咁樣網購返嚟$3xx 平香港買百幾蚊,香港counter買$505!



2016年7月14日 星期四

遲來的朝聖~LadyM


港女熱捧LadyM 千層蛋糕

講真雖然要排下隊先有得舒舒服服坐底食件Cake,但係真係味道唔錯。成件Cake🍰食晒都唔覺膩,Cream又滑一滑薄薄一層叠一層原全唔厚重,只有豐富口感又有蛋香👍🏻。

只係價錢有點兒貴,不過偶爾同姊妹一齊梳肝享受下氹下自己開心都係件賞心樂事!


另外,佢有杯Paris嘅茶值得一推,未飲入口淨係沖出嚟都已經香氣四溢,未入口已經加分不少!


2016年7月13日 星期三

辣辣車仔麵

一個辣汁令我迷上十年~

呢個辣汁車仔麵極好味,又香、又辣,料又夠新鮮,極推薦試辣豬紅👍🏻,蘿蔔無渣又甜,入味透心,其他餸亦都係有讚無彈,不過認住要登龍街呢間先好食咖!